• 

ရုပ်လွန်ကဗျာ

မင်း ဇာအချိန်လားချင်လေ
ငါ ယင်းကိုလားချင်ယင့်လားလေ့ မသေချာ
မင်း ဇာနီရာကိုလားချင်လေ
ဇာနီရာပင်ဆိုဆိုဝေ
အရာဇာနီရာမှာပင်မဆို ငါ ပြိုကွဲလားလီဖို့လို့ ငါ ထင်ရေ
ဟုတ်ဗျာလ် မင်းက အဂင့် ဆန္ဒဟိကေ ငါ လားပါမေ
ငါ ကောင်းဂရုစိုက်စော်မဟုတ်ဝေး
ယေလေ့ အရာဇာနီရာမှာပင်မဆို မင်း ပြိုကွဲလားလီဖို့လေ
ငါ အိမ်ကိုရာ လားလို့လေ့ ရရေ
ယင်းကိုလားဖို့အတွက် ငါမှာ အဂင့်ပြသနာမဟိပါဝေ
ယေလေ့ ယင်းကိုလားဖို့ မင်းကို ငါ အားနန့်မပြောချင်
မင်းငါ့ကို အားနန့်ပြောစော်ကမဟုတ်ပါကာ ငါ ခုချက်ချင်းလားဖို့ဗျာလ်ဒေ
ငါ ဇာနီရာမှာလေ့ အကြာကြီးနီနိုင်ဖို့မဟုတ်ဝေ
အပါးက တနီရာရာကို ငါရို့လားလို့လေ့ ရရေဝေါ်
ငါ ဂျတ်ကတ်မဝတ်ထား
မင်း လိုင်စည်းလေ့မဝတ်ထားပိုင်ဗျာလ်ယေ
ဟုတ်ဗျာလ် ငါရို့ လားကတ်ရဖို့လို့ ငါမပြောနန်
မင်းဝတ်ထားလာ မဝတ်ထားလာ ငါ ဂရုမစိုက်
ငါရို့ တခုကိုလေ့ အဂင့်ဂင့်လုပ်ဖို့တော့ မလိုနန်
ယကေ ကောင်းဗျာလ် မလုပ်ကေ့ဖိ
အိုကေ ငါ ဖုန်းဆက်လိုက်မေ
အေ ဆက်လိုက်

metaphysical poem by frank o hara

Search

Search

More

• 

တိရစ္ဆာန်တိ

ယင်းခါက ငါရို့ဇာပိုင်လေဆိုစော်ကို မင်းမိလားခဗျာလ်လာ
ငါရို့ ပထမတန်းကျတုန်းသိခါကလေ
နိရက်က သူ့ပါးစပ်မှာ ပန်းသီတလုံးနန့် ဝလို့ဖြိုးလို့ လာခါကလေ

အချိန် အကြောင်း စိတ်ပူနီလို့လေ့ အသုံးကမဝင်ပါဝေ
ယေလေ့ ငါရို့မှာ ဝှက်ဖဲချပ်တိက အဂင့်ဟိခကတ်တေလေ
ပြီးကေ တချို့ထောင့်ချိုးတိကိုလေ့ ကွေ့ခကတ်တေလေ

စားကျက်တခုလုံးက ငါရို့ အစာပိုင်ဗျာလ်ယေ
လျင်နှုန်းပြမီတာတိကို ငါရို့ မလိုခကတ်လေ
ရီခဲနန့် ရီကိုရာသုံးပနာ ကော့တေးတိ လုပ်နိုင်ခကတ်တေဝေါ်

ငါက အခုထက် ပိုလို့ လျင်ဖို့ကိုလေ့ လိုလီခဖို့မဟုတ်
ပိုလို့ စိမ်းဖို့ကိုလေ့ လိုလီခဖို့ကမဟုတ်
မင်းရာငါနန့်ဟိနီခကေလေ
အဝေ မင်းက ငါ့နိရက်တိအားလုံးမှာ အကောင်းဆုံးပါရာဝေ

Animals

Autobiographia Literaria

ငါ အချေခါ
ကျောင်းဝင်းထောင့်တထောင့်မှာ
ကိုယ့်စော်နန့်ကိုယ်ရာ ကစပ်နီတတ်တေ
လုံးချင်းထဲ။

ငါ အရုပ်ချေတိကို မုန်းခရေ
ဂိမ်းတိကို မုန်းခရေ
တိရစ္ဆာန်တိက ဖော်ဖော်ရွေရွေမဟုတ်
ငှက်တိက ပျံထွက်လားခကတ်တေ

တယောက်ယောက်က ငါ့ကို ရှာနီကေ
အပင်နောက်မှာစီ ပုန်းလို့နီတတ်တေ
ပြီးကေ အော်ပြောရေ
ငါက မိမဟိဖမဟိတယောက်ပါ

ဒေမှာ ငါ
အလှအားလုံး ဗဟိုမှာ
ဒေကဗျာတိကို ရီးယက်ပင်း
စိတ်ကူးကြည့်ချက်

• 

စီစဥ်ထားရေ အတိုင်း

ပထမဆုံး ဗော်ဒကာတခွက်ကို သောက်ပြီးလားခကေ
ဘဝနန့်ပတ်သက်လို့ ဇာချင့်ကိုမဆို မင်းလက်ခံနိုင်လားခဗျာယ်
မင်းကိုယ်တိုင်၏ ပဟေဠိဆန်မှုကိုပင်ယေ
ခြုပ်မီးဆွဲတဗူးက မညင်းရောင်နန့်အညိုရောင်ဖြစ်စော်ကို လာပတီး*လို့ခေါ်စော်ကို ဆွီဒင်ကနီလာစော်ကို ကောင်းရေလို့ မင်းထင်ရေ
ယင်းချင့်တိက မင်းသိရေ စကားလုံးတိကို
ယင်းချင့်က မင်းသိသမျှစကုန်ဗျာလ် စကားလုံးတိကိုရာလေ သူရို့ခံစားချက်တိကိုမဟုတ် သူရို့ဇာအဓိပ္ပါယ်လေ ဆိုစော်ကိုက မဟုတ်
ပြီးကေ မင်းရီးရေ
ယင်းချင့်တိကို မင်းသိလို့လေ
ယင်းချင့်တိကို နားလည်လို့ကမဟုတ်
မင်းနားမလည်လို့ မင်းကဖျင်းရေ ပျင်းရေ
တခါလေ့ ကြီးကျယ်လီဖို့မဟုတ်
ယေလေ့ မင်းသိစော်ကို မင်းလုပ်တေလေ
အရာဇာဟိသိလို့လဲ

as planned frank o’ hara

*La Petite

Les Étiquettes Jaunes*

အေနိ ပလတ်ဖောင်းထက်က
အရွက်တရွက်ကို ငါကောက်ခရေ။
အေချင့်က အချေဆန်ရေပိုင်ဗျာလ်။

အရွက်! မင်းက ကောင်ပင်ကြီးကာ
မင်း အရောင်ကို မင်းဇာပိုင်ပြောင်းလီလေချင့်
ပြီးကေ ကြွီကျဖို့ရုံ ။

ခိုင်မာတည်ကြည်မှု ဆိုစော်မျိုးက
မဟိရေပိုင်ဗျာလ်ကာ။

မင်း ငါ့ကို ပြန်ဖြေစော်က ကောင်းပင်အီးအီးသက်သာ
ငါ့မှာ ဖိပြောဖို့ပင် ကောင်းကြောက်မိလားခရေ။

အရွက်! ပုသွင်ချေပိုင်
စိုးရိမ်ယောက်ယက်ခပ်မနီကေ့။

• The Yellow Etiquettes

ဝမ်းနည်း ဘရိတ်ဖက်

ဝမ်းနည်း ဘရိတ်ဖက်
အထက်မှာ အပြာ အောက်မှာ အပြာ

တိန်းနီရေ ကြက်ဥက အတွက်ခံနီရေ
ပြီးကေ ပေါင်မုန့်ကင်စက် လျှပ်စစ်နား က စောင့်နီရေ

ကြယ်တိက
“ဝှက်ထားရေ ယင်းမိုးရိပ်’ထဲမှာ

မယုံကြည်မှု အရိပ်လက္ခဏာတိ
မိုးထသားမှာ ကောင်းအားကောင်းနီကတ်တေ

Melancholy Breakfast Frank O Hara

ငါက ဇာအတွက်နန့် ပန်းချီဆရာမဖြစ်

ငါက ပန်းချီဆရာမဟုတ်၊ငါက ကဗျာဆရာ။
ဇာအတွက်နန့်လဲ။ပန်းချီဆရာရာ ဖြစ်ရဖို့စော်လို့
ငါထင်ရေ။ယေလေ့ မဖြစ်ခ။ဟုတ်ဗျာလ်
ဥပမာ မိုက်ဂိုးဘာ့*က ပန်းချီတကားစလို့ဆွဲနီရေ။
ငါက သူ့ဘားကိုဝင်ရေ။
“ထိုင် တခုခုသောက်”သူကပြောရေ။
ငါ သောက်တေ။ငါရို့သောက်ကတ်တေ။ ငါ မော့ကြည့်လိုက်တေ။”ယင်းမှာ မင်း ဆာဒင်း°တိဆွဲထားရေနန်း”
“အေ ယေမှာ တခုခုပါဖို့လိုရေလေ”
ငါ ပြန်ခရေ ရက်တိလေ့ ကုန်ခရေ
ငါ သူ့ဘားကိုဝင်ရေ။ပန်းချီကားက ဆက်ဆွဲတုန်းသိ။
ငါ ပြန်ခရေ ရက်တိလေ့ ကုန်ခရေ။
အရာတခါ ငါ သူ့ဘားကိုဝင်ရေ ။
ပန်းချီကားက လက်စသတ်ခဗျာလ်။ “ဆာဒင်းတိဇာရောက်ခရောင်”
ကျန်ခစော်ဆိုလို့ စာလုံးတိရာ ဟိဗျာလ်။
“ယင်းချင့်က ကောင်းများလွန်းရေ”မိုက်ကပြောရေ။

ငါဝေါ်။တရက်သား အရောင်တရောင်ကို ငါ အတွက်ခံနီရေ၊ လိမ္မော်ရောင်ကို။လိမ္မော်ရောင် အကြောင်း လိုင်းတကြောင်းရီးလိုက်တေ။
တချက်ချေရာကြာလိုက်တေ စကားလုံးတိက တပြင်လုံးဖြစ်လားခရေ၊လိုင်းတိတော့ခါ မဟုတ်။
ပြီးကေ အရာတပြင်။အရာကောင်းအများကြီး ပါသင့်ရေ၊ လိမ္မော်သီးအကြောင်းမဟုတ်
စကားလုံးတိ၊လိမ္မော်သီးက ဘဝကဇာပိုင် စိတ်ပျက်ဖို့ကောင်းရေ ဆိုစော်တိ။
ရက်တိကုန်ခရေ။စကားပြင်မှာတောင် ငါက အဂင့် ကဗျာဆရာ။
ငါ့ကဗျာက လက်စသတ်ဗျာလ်။လိမ္မော်ရောင်အကြောင်းကျ မဖော်ပြရသိ။ကဗျာက ၁၂ပုဒ်။ လိမ္မော်သီးတိလို့ ငါ ခေါင်းစိုင်ပီးလိုက်တေ။
တရက်သား ပန်းချီပြခန်းမှာ မိုက် ပန်းချီကိုငါမြင်မိရေ။ နာမည်က ဆာဒင်းတိလတ်။

*Michael Goldberg အမေရိကန်ပန်းချီဆရာ Absract Expressionist တယောက်
°Sardine စည်သွတ်ဗူးလုပ်တေ ငါး

Why I Am Not A Painter Frank O’ Hara

တေးခြင်း

ဗျု့ကားဝါ့ယှော့* နားမှာ ငါ လမ်းလျှောက်နီစော်ကို မင်းမြင်ခလာ
ငါ မင်းအကြောင်း စဥ်းစားနီခစော်
အပူထဲမှာ ကုတ်တဗူးသောက်ယက်ပင်း၊ဘိုင်စကုပ်မဂ္ဂဇိင်းမှာ
ငါ မြင်ခစော်က မင်းမျက်မှာ၊ မဟုတ် ယင်းချင့်က ဖေဘီယန့်**မျက်နှာရာ
ငါ မင်းအကြောင်း စဥ်းစားနီခစော်
ဘူတာရုံ ထူးထူးဆန်းဆန်းပျောက်လားခရေ မီးရထားလမ်းမှာ
ငါ မင်းအကြောင်း စဥ်းစားနီခစော်
နီဝင်စမှာ ဘာ့စကားထွက်လားခခါ
ငါ မင်းအကြောင်းစဥ်းစားနီခစော်
ပြီးကေ အခု လက်ငြင်းမှာလေ့

Song

*The Buick Repairs
** Francoise Fabian ပြင်သစ်ဘိုင်စကုပ်မင်းသမီးတယောက်

ေဗဒင်စာရွက်ပါေရ ကွတ်ကီးတိအတွက် စာေြကာင်းတိ

မင်းက အံ့ဩဖို့ကောင်းရေလို့ ငါထင်ရေ၊အရာလူအားလုံးလေ့ ယပိုင် ထင်ကတ်တေ။

ဂျက်ကီကနေဒီ*က အဘုချေယောက်ျားချေတယောက်ရရေပိုင် မင်းလေ့ရဖို့၊ ပိုလို့တောင်ကြီးဖို့သိ။

ရွှေရောင်ဆံပင်နန့် ထောင်ထောင်မောင်းမောင်း လူစိမ်းတယောက်ကို မင်းတွိဖို့၊ မင်းက “ဟယ်လို” လို့တော့​နှုတ်ဆက်လီဖို့မဟုတ်။

မင်း ခရီးအရှည်ကြီးတခုလားရဖို့၊မင်း ကောင်းပျော်ရဖို့၊ လုံးချင်းထဲဆိုကေလေ့သင့်ယေ။

မင်းမျက်လုံးတိကို တောက်ထားရေ ကြက်ဥတိနန့် တူရေလို့ ပထမဆုံးပြောရေလူကို မင်းယူဖို့။

အစဦးဆုံးမှာ “မင်း” ဟိခရေ၊ရက်ပြတ်လေ့ “မင်း” ဟိနီလီဖို့လို့ ငါထင်ရေ။

မင်း ပြဇာတ်အကြီး တပုဒ်ကိုရီးဖို့၊ ယင်းပြဇာတ်က သုံးကြိမ် စင်တင်ပြရဖို့။

The Village Voice**ကို အခုချက်ချင်း ဖုန်းဆက်လိုက်၊ သူရို့ မင်းကို အိန်တာဗျူးချင်နီကတ်ဗျာလ်။

ရော်ဂျာ အယ်လ် စတီဗန်စ်နန့် ကာမစ် ဘလုံးဂါဒန်*ရို့က မင်းကို မျက်စိကျနီကတ်ဗျာလ်။

ဆကေ စိတ်လျှော့ထား၊ မင်းမှာ နာမည်အကြီးဆုံး စိတ်လှုပ်ယှားကေ ပါဒရလိုက်တတ်စော်က မင်းကို ပြန်ဖျက်စီးလိမေ။

ပထမဆုံးကဗျာစာအုပ်ကို မင်း လက်စသတ်ပြီးစော်နန့် ချက်ချင်း ပုံနှိပ်ခံရဖို့။

မင်းက မြို့စွန်မှာ ပေါက်တေဆိုရုံ ဆိုကေလေ့ မြို့လည်မှာကျကေ ရာဇဝင်တွင်ဖို့။

မင်း လမ်းလျှောက်စော်မှာ ဂီတအရည်အသွေးဟိရေ၊ ယင်းချင့်က မင်းကို နာမည်ကြီးအောင် ကြီးပွားအောင်ပျင်ဖို့။

မင်း ကိတ်မုန့်စားဖို့။

မင်းဖာသာမင်း ဇာသူထင်နီလေ။ ဂျို ဗန်ဖလိ°လား။

မင်းဘဝက ပီရန်ဒယ်လို°°ပိုင်လို့ မင်းထင်ရေ၊အမှန်က အိုနေးလ်°°°ပိုင်ရာ။

ဂျိမ်းစ်ဝါရိန်း°°°°နန့် အကဆကေသင်လိုက်ကေ အသူပြောနိုင်ဖို့လဲ၊ တခုခု ဖြစ်ချင်လေ့ ဖြစ်ဖို့။

ယင်းချင့်က မင်းခြီစွပ်က အပေါက်ရာမဟုတ်၊မင်းခြီထက်က လက်တဖက်ရာ။

မင်း ပြင်သစ်မှာ နီခရေဆိုစော်ကို ငါသိပါဗျာလ်၊ ယေနန့်ပင်က မင်းအားလုံးကို သိရေလို့ အဓိပ္ပါယ်မထွက်ပါကာ။

အဖြူရောင်ကို ပိုလို့ဝတ်ပီးရဖို့၊ မင်းဆိုစော်နန့် အဖြူရောင်ဗျာလ်လို့ ဖြစ်လာအောင်။

မင်းကို စကားလာပြောဖို့ နောက်တယောက်မှာ ကောင်းစိတ်ဝင်စားဖို့ ကောင်းရေ ကမ်းလှမ်းချက်တခု ဟိလီဖို့။

အေအခန်းထဲက လူများကာက သူရို့ရာ မင်းဖြစ်ခကေကောင်းဖို့လတ်။

မိုက်ဂိုးဘာ့’ပန်းချီပြပွဲကို လားဖူးလာ၊ အယ်လ် လက်စလီ”ပွဲကိုဝေါ်၊ လီကရာစနာ”‘ပွဲကိုဝေါ်။

တခါတလီ မင်း စိတ်မဝင်စားပိုင်ပျင်စော်ကို တစိမ်းတိက မရိုးသားလို့ ထင်လားလီနိုင်ရေ။

အခု ရွေးကောက်ပွဲလေ့ ပြီးဗျာလ်ဆိုခါ မင်းဖာသာမင်း ဇာဆက်လုပ်ဖို့လဲ။

မင်းက ခရုပေါင်မုန့်စက်ရုံက အချုပ်သား၊မင်းက ယင်းချင့်ကို ချစ်တေ။

မင်း အသားစားရေ။မင်း ဇာအတွက်နန့် အသားစားစော်လေ။

မိုးကုပ်စက်ဝန်းအလွန်မှာ အုံ့မှိုင်းတောင်ဂျိုင် တဂျိုင်။

မင်းလေ့ ပြင်သစ်ဝန်ကြီးချုပ်ဖြစ်နိုင်စော်ဗျာလ်လေ …..အကယ်လို့ရာ …..အကယ်လို့ရာ

Lines for Fortunes Cookies by Frank O’ Hara

• Jackie Kennedy သမ္မတကတော်
  ** The Village Voice တန်ပြန်ယိုင်ကျေးမှု၊နိုင်ငံရေးအကြောင်းတိဖော်ပြတတ်တေ နျူးယော့ သတင်းစာတစောင်
  *** Roger L Stevens
  **** Kemit Bloomgarden ပြဇာတ်သျှင်တိ
  ° Joe Van Fleet အမေရိကန်ဘိုင်စကုပ်မင်းသမီး
  °°Luigi Pirandello အီတလီပြဇာတ်ဆရာ
  °°° Eugene O Neil အမေရိကန် ပြဇာတ်ဆရာ
  °°°° James Waring အမေရိကန် အကဆရာ
  ‘ Mike Goldberg
  ” Al Leslie
  ”’ Lee Krasner အမေရိကန် ပန်းချီဆရာတိ
• ank O Hara

သူရို့ဘားက တလှမ်းအဝီး

ငါ နိခင်းဘက် အစာစားချိန်၊
ဆိုခါ ပျားပန်းခပ်ရောင် တက္ကစီတိကြားမှာ လမ်းတခေါက်လျှောက်လို့လားရေ။
အလုပ်သမားတိက စုပ်ပီစုပ်ပက် သူရို့ဝမ်း လဲ့လဲ့ပြောင်ပြောင်တိကို
ဆန်းဝိချ်နန့်ကိုကာကိုလာကျွေးနီကတ်တေပလက်ဖောင်းအတိုင်း ပထမလားရေ။ဟဲလမတ်အဝါတိဝတ်ထားကတ်တေ။
အုတ်ခဲတိ လူးကျလာကေ ယင်းဟဲလမတ်တိက သူရို့ကို ကာကွယ်ပီးဖို့ အတွက်ဟိဖို့လို့ ငါထင်ရေ။
ပြီးကေ ဒေါက်ဖိနပ်ထက်မှာ လှန်တက်နီပနာ သံဇကာထက်မှာ ဖောင်းတက်နီရေ စကာ့တိ“ဟိရေ ရိပ်သာလမ်းကို တက်တေ။
နီကပူနီရေ၊ယေလေ့ တက္ကဆီတိက လီကို နောင်အောင်မွီနီရေ။
လျှော့စျီးနန့်ရောင်းနီရေ လက်ပတ်နာရီတိကို ငါကြည့်ရေ။
လွှစာမှုန့်တောမှာ ကြောင်တိ သဲနီကတ်တေ။

ပြီးကေ

တိုင်းစကွဲယားကို ဆက်လားရေ။ယေမှာ ဆိုင်းဘုတ်တခုက ငါ့ခေါင်းထက်ကို မီးခိုးမှုတ်ထုတ်တေ။
ယင်းထက်အမြင့်မှာ ရီတံခွန်က အီးလို့ချေ ရီကျနီရေ။
နီဂရိုးတယောက် သွားကြားထိုးတံတချောင်းကိုက်ပနာ တံခါးပေါက်မှာရပ်နီရေ၊ပျင်းစာရိစာစိတ်လှုပ်ယှားအောင်ပျင်နီရေ။
ရွှေရောင်ဆံပင်နန့် အကအဖွဲ့ကကလေ့မေချေတယောက်က ဖြတ်ခနဲရိုက်တေ၊ သူက ပြုံးပနာ မိတ်ကို ပွတ်ခံထားရေ။
အားလုံး ဗြုန်းခနဲ ဟွန်းတီးလိုက်ကတ်တေ။ ကြာသပတီးနိတရက် ၁၂:၄၀။

နိခင်းဘက်အလင်းမှာ

နီယွန်မီးတိက ကောင်းကောင်းစိတ်ပျော်ဖို့ကောင်းရေ၊အီဒွင် ဒင်ဘီက ယပိုင်ရီးဖို့၊ နိခင်းဘက်အလင်းမှာ ဘားသီးတိလေ့ ယပိုင်။ ဂျူးလီယပ်ကော်နာမှာ ချီးစ်ဘာဂါတလုံးဝယ်ဖို့ ငါတန့်ရေ။ ဂီလီယက်တာ မာစီနာ*၊ဖရက်ဒရီကို ဖယ်လီနီမှာမယား၊အလှမင်းသမီး။
ပြီးကေ ချော့ကလိတ်မော့။
အေပိုင်ရက်မျိုးမှာ အမွှီးထူအင်္ကျီဝတ်ထားရေ လေဒီတယောက်က သူ့ ခွီးပုချေကို တက္ကဆီတစီးထဲကို ထည့်နီရေ။
အေနိ
ရိပ်သာလမ်းထက်မှာ ပွာတိုရီကန်တိ အများကြီး
ယင်းသူရို့ဟိနီလို့ လမ်းက လှပနာ နွီးထွီးနီရေ။ပထမဆုံး
ဘင်နီ° သီရေ။ ပြီးကေ ဂျွန်လာတု့ချ်°
ပြီးကေ ဂျေဆန်ပိုလော့°
ဘဝက ပြည့်ဝခရေပိုင် ကမ္ဘာက သူရို့နန့် ပြည့်နီလီလာ
လူတယောက်က အစာစားရေ လမ်းလျှောက်တေ၊
လင်းကြဲပုံတိပါရေ မဂ္ဂဇင်းဘေးက ဖြတ်လို့၊
ကျွဲရိုင်းသတ်ပွဲ ကြော်ငြာပိုစတာတိဘေးက ဖြတ်လို့၊
ပြီးကေ မတ်ဟန်တန် စတိုဂိုဒေါင်ဘေးက ဖြတ်လို့။
ယင်းနီရာကိုလေ့ သူရို့က တနားနီကေ ဖြိုချပစ်ကတ်ဖို့ဗျာလ်။
ယေမှာ အာမော်ရီပန်းချီပြပွဲလုပ်ခကတ်တေလို့ ကျနော် ထင်ခဖူးရေ။

ဗဒကာသီးဖျော်ရည်တခွက်၊
ပြီးကေ အလုပ်ကိုပြန်လာ၊
ငါ့နှလုံးသားက ငါ့အင်္ကျီအိတ်ထဲမှာ
ယင်းချင့်က ပီယေးရီဗာဒီ***ကဗျာတိ။

*Edwin Denby အမေရိကန်စာရီးဆရာ
**Giulietta Masina အီတလီမင်းသမီး
****Pierre Reverdy ပြင်သစ်ဆူရီယယ်ကဗျာဆရာ
°Abstract Expressionist ပန်းချီဆရာတိ
“အေချင့်က မာရီလင်မွန်ရိုးကို အတွက်ရစီရေ

Frank O ‘ Hara Fr A Step Away From Them

• 

“မြို့ပြဘဝ နန့် သန်းချီရေ ဆက်စပ်ပတ်သက်မှုတိက သူ့ကဗျာမှာ ပျားပန်းခပ်နီရေ။ဂေါ်ဖီထုပ်၊ပါချူလီပန်း၊ ကာဘွန်မိုနောက်ဆိုက် နံတိက သူ့ကဗျာမှာ ရွှင့်ပျံ့နီရေ။”
John Ashberyက ဖရန့်ကဗျာပေါင်းချုပ် မိတ်ဆက်စာမှာ ယပိုင် ရီးခရေ။

ဖရန့်အိုဟာရာကဗျာတိက ဒိုင်ယာရီစာအုပ်မှာ ရီးမှတ်ထားစော်နန့်တူရေ entries in a diary ၊ ကိုယ်တိုင်ရီး အတ္ထုပ္ပတိဆန်ရေ autobiographical လို့ ဆိုကတ်တေ။ အေကဗျာထဲမှာ ယင်းဟန်တိကို မြင်နီရရေ။ ချစ်ဖို့ကောင်းရေ အတိအကျတိ charming accuracy ကိုလေ့တွိရရေ။ ၁၂ ၄၀ ဆိုရေ အချိန်အတိအကျမျိုး ဂျူးလိယက်ကော်နာက ချီးစ်ဘာဂါ ဆိုရေ နီရာ အတိအကျမျိုး။

"ငါရို့ထဲမှာ နိုင်ငံရေးနွယ်စော်တယောက်ပါကေ ယင်းတယောက်က ဖရန့်ဗျာလ်" လို့ သူ့အပေါင်းအသင်းတိကပြောကတ်တေဆိုရေ။ စုပ်ပဲရေ အလုပ်သမားတိ နန့် အမွှီးထူအင်္ကျီဝတ်ထားရေ လေဒီက ယင်းထဲက တစလား။ နောက် နီဂရိုး ပွာတိုရီကန် ဆိုစော်တိက ယင်းခေတ်က အမေရိကန် လူမျိုးခွဲသဘော Racismကို ဆိုလီလာ။ဖရန့်ကတော့ခါ သူရို့ကြောင့် ရိပ်သာလမ်းက ပိုလှပနာ နွီးထွီးနီရေလတ်။

နောက်တခုက နာမည်တိအများကြီးပါတတ်စော်လေ့ ဖရန့် ဟန်တမျိုးဗျာလ် ဆိုပါရေ။အရာ Coterie ကဗျာတိမှာလေ့ တွိရတတ်တေလက္ခဏာတခုဆိုရပါဖို့။အေချင့်နန့်ပတ်သက်ပနာ အကျယ်တဝင့် ရီးကတ် ဝေဖန်ကတ်စော်တိတော့ဟိရေ။ Bunny Lung ၊John Latouche၊ Jason Pollockရို့က AEပန်းချီဆရာတိ။အေပိုင်နာမည်တိကို သုံးစော်မျိုးကို အယင်ခါ ဗမာကဗျာတိမှာလေ့တွိရတတ်တေ။နာမည်တိက ရည်ညွှန်းစော်တိလေ့ တခါတလီဟိတတ်တေ။တခါတလီလေ့ ရင်းနှီးကျွမ်းဝင်မှုအတိုင်းအတာကိုပြရုံထင်ပါရေ။ယင်းနာမည်နန့် လူတိကိုမသိကေလေ့ အေကဗျာက ဆက်ဖတ်လို့ရရေပုံပါ။အပေါင်းအသင်းတချို့လေ့ သီခဗျာလ်ဆိုစော်နန့် ဘန်နီရို့ လာတုချ်ရို့ သီဗျာလ်ဆိုစော်ကြားမှာ ဇာခြားနားလေ။

ေလဒီသီေရနိ

• 

သူ့ကဗျာတိက ရမ္မက်အပြည့်၊ ဘဝအပြည့်။အသေးအမွှားချေတိကို သူ့ကဗျာတိထဲမှာ နာမည်တပ်ပနာခေါ်လို့တော့ခါ သူ့ကဗျာတိက သာမန်ကာလျှံကာ မဖြစ်။ Kenneth Koch

အေကဗျာက Jazz အဆိုတော် Billie Holiday သီခါရီးခရေ လွမ်းခြင်း Elegy တပုဒ်။ BHကို သူ့အသိုင်းအဝိုင်းက Lady Day လို့ ခေါ်ကတ်တေဆိုပါရေ။

Elegy များကာနန့်ကွာစော်က ကဗျာဖွဲ့ခံရရေ လူအကြောင်းက ပါးပါးချေရာပါနီစော်ဗျာလ်လို့ဆိုပါရေ။မြို့ပြဘဝမှာ မသေချာစော်တိ၊အချိန်ကန့်သတ်ခံရစော်တိ၊ရွီးချယ်ရ ဆုံးဖြတ်ရဖို့များစော်တိက များကာနီရာယူထားရေ။

လေဒီ သီရေနိ

နျူးယော့မှာ သောကြာနိတရက် ၁၂:၂၀
ဘတ်စတီး*နိအလွန် ၃ရက်မြောက်၊ ဟုတ်တေ
၁၉၅၉မှာ၊ ဖိနပ်ပြောင်အောင်အတိုက်ခံဖို့ ငါ လားရေ
၄:၁၉ ထွက်တေ မီးရထားကနီ အီစသန်တန်မှာ
၇:၁၅မှာ ဆင်းရဖို့ ပြီးကေ ညစာစားပွဲကို ဒါရိုက်လားရဖို့ ဖြစ်လို့လေ
ငါ့ကို ကျွေးဖို့လူတိကိုတော့ခါ ငါမသိ

နီစထွက်နီရေ ပူပူစွတ်စွတ် လမ်းအတိုင်း ငါ လမ်းလျှောက်တေ
ဟမ်ဘာဂါတလုံးစား မော့တခွက်သောက်တေ ပြီးကေ
အရုပ်ဆိုးရေ “ကမ္ဘာသစ်စာပီ”** တစောင်ဝယ်ရေ
အခုတလော ဂါနာ***က ကဗျာဆရာတိ ဇာပျင်နီကတ်လေ သိရအောင်လို့

ငါ ဘဏ်ကို ဆက်လို့လားရေ
မိစ်စတေးဝါဂွင်က (သူ့ နာမည်က လင်ဒါလို့ ငါတခါ ကြားလိုက်မိရေ) သူ့တဘဝလုံးမှာ ငါ့ ဘဏ်လက်ကျန်စာရင်းကို အေတခါရာ မကြည့်ဖူး
ပြီးကေ ဂိုးလ်ဒန်းဂရင်ဖင်က
ဘွန်းနာ့ ဆွဲရေ ပုံတိပါရေ ဗာလိန်းစာအုပ်ချေကို ပတ်ဆီအတွက်ဝယ်ရေ
ရိချ်မွန် လာတီမိုး ဘာသာပြန်ရေ ဟီဆီယော့
မဟုတ်တာ့ ဘရန်ဒန်ဘီဟန် ပြဇာတ်အသစ်
မဟုတ်တာ့ ဂျနေး ရီးရေ လာဘယ်ဂွင် ဖြစ်ဖြစ် လက်စ် နီဂရေးစ် ဖြစ်ဖြစ် ဝယ်ဖို့ကြံသိရေ၊ယေလေ့ မဝယ်ဖြစ်၊
ဇာလုပ်လို့ဇာပျင်ရမေမသိပဲနန့် လက်တွိ အိပ်ရာဝင်ဖူးခဗျာလ်ဆိုခါ
ငါက ဗာလိန်းနန့် ငြိဗျာလ်လေ

ပြီးကေ မိုက်အတွက်ကျကေ ပါ့လိန်း အရက်ပုလင်းဆိုင်ကို အီးအီးသက်သာဝင်ပနာ ဆထရီဂါတပုလင်းတောင်းလိုက်တေ
ပြီးကေ ငါလာခရေ နီရာကို ပြန်လားရေ ၆ လမ်းကို
ပြီးကေ ဇိဖတ်သီယေတာက ဆလိပ်သည်ဘားကို
ဂိုလွာ့စ် တကာတွန့် နန့် ပီကာယွန့် တကာတွန့် ပြီးကေ နျူးယော့ပို့စ်တစောင် အမှုအမှတ်မဟိပဲနန့် မှာလိုက်တေ
ယင်းမှာ သူ့မျက်နှာ

အခု ငါ ချွေးတိအပြိုက်ပြိုက်ထွက်ပါလတ်တေ
ပြီးကေ ဖိုက်စပေါ့****က ချဘောင်သာတံခါးမှာမှီနီခစော်ကို အတွက်ခံမိရေ
ကီးဘုတ်နန့် မာလ်ဝေါ်ဒန်°နန့်တူတူ တေးခြင်းတပုဒ်ကို သူက တိုးတိုးချေ လိုက်ဆိုနီချိန်
အားလုံးသူ နန့်ငါ အသက်ယှူတန့်နီခကတ်တေ။

The Day Lady Died By Frank O’ Hara

• Bastille Day ဂျလိုင် ၁၄ ပြင်သစ်အမျိုးသားနိ
  ** New World Writing မဂ္ဂဇိင်း
  *** Ghana နိုင်ငံ
  **** Five Spot Cafe နျူးယော့က ကဖေး ဂျက်ဇ်ဂီတ သမားတိစုလေ့ဟိရေနီရာ
  ° Mal Waldon ဂျက်ဇ် ဂီတသမား Bille Holiday ဆိုကေ သူက ပီယာနိုနီးရေ

တတိယပိုဒ်က နာမည်တိ စာအုပ်နာမည်တိပါရာ
Hesiod ဂရိရှိခေတ်ကဗျာဆရာ Richmond Lattimore က ဘာသာပြန်ခရေ
le balcon နန့် les negrais က ပြင်သစ်ပြဇာတ်ဆရာ Jean Genet ရီးခရေ ပြဇာတ်တိ
Brendan Behan က အိုင်းရိစ်ကဗျာနန့် ပြဇာတ်ဆရာ
Paul Verlaine က ပြင်သစ်ကဗျာဆရာ

PS အေကဗျာကိုဖတ်ဖို့ အေချင့်တိကို မသိလေ့ရပါရေ
ဇာစာအုပ် ဝယ်ရဖို့မသိဖြစ်နီရေ ဇာဆလိပ်ဝယ်ရဖို့မသိဖြစ်နီရေ
သူငယ်ချင်းတိအတွက် ဆိုင်တဆိုင်ကထိုဝယ်ရေ ဒေဝယ်ရေ ဆိုကေလေ့ ရတော့ခါ ရပါရေ
ယေလေ့ မောင်ဖြူအတွက် အောင်ကျော်ဆိုင်က ခေါက်ဆွဲဝယ်ရေ
မောင်နီအတွက် ဖြိုးစတိုးက ဒန်ဟီးတဗူးဝယ်ရေ ဆိုရေပိုင်မျိုးတော့ ရင်းနှီးမြင်သာမှု မဟိထင်ပါရေ
ဖရန့်ကဗျာတိမှာကါရေ နာမည်များကာက ယင်းအလုပ်ကို လုပ်ပီးရေ ထင်ပါရေ