ခေတ်ပြိုင်ကိုးရီးယားကဗျာလောကမှာ ဩဇာကြီးရေ ကင်ဟီဆွန်း Kim Hyesoonကို ၁၉၅၅ မှာမွီးရေ။ကိုးရီယားစာပီဆိုင်ရာနန့် PhD ရေ ၁၉၇၉ ကပင် ကဗျာလောကထဲကိုဝင်ခရေ။ယင်းအချိန် ၁၉၇၀ ၁၉၈၀ ကာလတိက အမေရိကန်နောက်ခံကိုးရီးယားစစ်အာဏာရှင် ပတ်ချွန်ဟီး နန့် ချွန်ဒူးဝမ်းအစိုးရတိကို ဆန့်ကျင်ရေး အာဘော်ဟိရေ literature and intellect မဂ္ဂဇင်းမှာ အစောဆုံးဖော်ပြခံရရေမိန်းမတယောက်။နိုင်ငံရေးအလုပ်တိမှာလေ့ ဝင်ပါခရေ။ ကိုးရီးယားစာပီနယ်မှာ အထင်ကရဖြစ်တေ Midang နန့် Kim Su Yong ကဗျာစာပီဆုတိကို ပထမဆုံးရခရေ မိန်းမကဗျာဆရာ။၂၀၁၉ မှာ သူ့ကဗျာစာအုပ် Autobiography of Death က Griffin Poetry ဆုရခရေ။လက်ဟိ ဆိုးလ် အနုပညာကျောင်း the Seoul Institute of the Arts မှာ ရသစာပီ သင်ပြနီရေ။

"ပျောက်လားခရေ မိန်းမရို့မှာ အသံက ကျွီးနီရေ။ ယင်းပျောက်ကျခရေ မိန်းမတိအသံက ပဲ့တင်ထပ်နီရေ။ငါက ယင်းအသံတိနန့် တေးခြင်းဆိုရေ"လို့ ကင်ဟီဆွန်းကဆိုရေ။

ကိုးရီးယားစာပီအစဉ်အလာမှာ ကဗျာဆရာမတိကို မိန်းမကဗျာဆရာ(ယောယူယှိမ်း)လို့ခေါ်လေ့ဟိရေဆိုပါရေ။ ယောက်ျားကဗျာဆရာတိကိုကျကေကဗျာဆရာ (ယှိမ်း) လို့ရာ ဝိသေသမပါပဲနန့်ခေါ်ရေ ဆိုပါရေ။ကင်ဟီဆွန်း အမြင်အရ အေချင့်က မိန်းမရို့၏ စစ်မှန်ရေ အသံတိကို ဘောင်သတ် ခွဲခြားရာရောက်တေလို့ဆိုပါရေ။ ယောယူယှိမ်း တယောက်ဆိုကေ ချစ်ကောင်းထမန့်ချေတိ စိတ်ကစပ်စော်ချေတိ နုညံ့စော်ချေတိကိုရာ ရီးရဖို့ဆိုရေ သတ်မှတ်ချက်မျိုး။အကျယ်ချဲ့ကြည့်ရဖို့ဆိုကေ အေပိုင်စော်တိက ကိုးရီးယာလိင်သတ်မှတ်ချက်စံအရ လက်သင့်ခံနိုင်ရေ မိန်းမတယောက်၏ အမူအကျင့်တိလို့ဆိုရပါဖို့။

ကင်ဟီဆွန်းက ကဗျာကို မလှလီအောင်လို့ ဒုတ်သီမုတ်သီခံကြိုးစားရေ။စိတ်လုပ်ကစပ်တေ နုညံ့ရေ ယောယူယှိမ်းကဗျာမျိုးကို တသီးတမံဆန့်ကျင်ပနာ အကြမ်းပတမ်းပုံရိပ်တိ အန်စော် အညှက်ဆိုး ယိုယွင်းခန္ဓာတိ သီခြင်းရို့ကိုဖွဲ့တတ်ပါရေ။ မိန်းမတယောက်၏ အရွယ်သုံးပါး အပျို အိမ်ထောင်သည် သားသည်အမိ ကို တမင်ပျင်ထားရေ ကြမ်းတမ်းရေ နိမိတ်ပုံတိနန့် ဖွဲ့လေ့ ဟိရေ ဆိုပါရေ။

လင်းကြဲ ရီခဲ ခန္ဓာ

နှင်းဖြူဖြူကို သိမ်းထားရေနီရာတခု၊ မိုးသီးတိအပြည့်နန့် စတိုခန်းတစ်ခန်းကို နင် ရောက်ဖူးလာ

ပင်လယ်အောက်က ရီခဲလော်ကာတခုကို နင် ရောက်ဖူးလာ
ရီမှာ အနယ်ခံရရေ ငါးတိ အသက်ယှူအောင့်ထားကတ်စော် နင် မြင်ဖူးလာ

တောင်ပိုင်မြင့်ရေ နှင်းပုံ တပုံ၊ နင့်နှလုံးသားထဲ နှင်းကျနီခါ
ယင်းနှင်းထဲမှာ ပုန်းနီရေ တယောက်ယောက်ကို နင် မြင်ဖူးလာ
ယင်းသူ နိုးကျလို့ မျက်စိတိကို ဖွင့်လိုက်တေအခါ
မိုက်နီရေ လ ငိုယင်းနန့်ထွက်လာစော် နင် မြင်ဖူးလာ

အယင်ပြီးနီရေ တောင်ဖြူဖြူတိကို ကျည်ဆံမီးရထားထက်က ဖမ်းဖို့ နင် ကြံဖူးလာ
တောင်တိ အီးအီးစက်စက် စိုက်ကြည့်နီစော်ကို နင် သည်းခံတောင့်ခံဖူးလာ

ရီခဲတုံးတစ်တုံးကို လူမမာတစ်ယောက်ပိုင် ပုဆို့ဟပ်နန့်ပတ်လို့ ရွက်ထားပနာ
ဟုန်းဟုန်းတောက် နွီနီအောက် သူ့မျက်ရည်တိကို သုတ်နီရေ မိန်းမတယောက်ယောက်ကို နင် မြင်ဖူးလာ
နီပူလောင်နီရေ လင်းကြဲ ရီခဲ ခန္ဓာကို နင် တို့ကြည့်ဖူးလာ

ညဥ့်လယ်ခေါင်မှာ နိုးနီသိရေလူရုိ့ဘားက မျက်ရည်တိကို နင် စားဖူးလာ
အရည်ပျော်ရရေအခါ ရီခဲအမာရေ ဇာပိုင်ခံစားလီရဖို့လဲ နင် အတွက်ခံကြည့်ဖူးလာ
ဆိုကေ နားစိုက်လိ့ုရာထောင် ၊ ရီခဲမင့်သမီး စကားပြောနီရေ
မိုးသီးတိအပြည့်နန့် စတိုခန်းတခန်းကို နင် ရောက်ဖူးလာ
ရီခဲ အရည်ပျော်လာခရေ စတိုခန်းတခန်းမှာ သတိလက်လွတ် နင် ရပ်နီဖူးလာ

ကင်ဟီဆွန်း

The Naked Body of Ice

ငါ မှန်ကိုဖွင့်ပနာ ဝင်လိုက်တေ
ငါ့အမိ ယင်းမှန်ထဲမှာ ထိုင်နီရေ
ပြီးကေ
ငါ မှန်ကို ဖွင့်ပနာ အရာဝင်လိုက်တေ
ငါ့ အမိမှာ အမိ ယင်းမှန်ထဲမှာထိုင်နီရေ
ပြီးကေ
ငါ့ အမိမှာ အမိ ထိုင်နီရေ မှန်ကိုတိုးလို့ ဝင်ဝက ဝင်လိုက်တေ
ငါ့အမိမှာ အမိမှာ အမိ ယင်းမှန်ထဲမှာသွားဖြဲပြုံးနီရေ
ပြီးကေ
ငါ့အမိမှာ အမိမှာ အမိ ပြုံးနီရေ နှုတ်ခမ်းတိကြားက ငါ ခေါင်းထိုးလို့ဝင်လိုက်တေ
ငါ့အမိမှာ အမိမှာ အမိမှာ အမိက ယင်းမှန် အထဲမှာ
ငါ့ထက်ပင်နုသိရေပုံနန့် ငါ့ကို နောက်ခိုင်းလို့ထိုင်နီရေ
ငါ မှန်ကို ဖွင့်ပနာ ဝင်လိုက်တေ
အရာထပ်ဝင်ရေ
အရာတခါထပ်လို့ဝင်လိုက်တေ
မှန်ထဲမှာက ပိုလို့ပိုလို့ မှောင်ပါလတ်တေ
ငါရို့ အစိုင်က အမိတိအားလုံး မှန်ထဲမှာထိုင်နီကတ်တေ
အမိတိအားလုံး
နှုတ်ခမ်းတိစူပျာလ် အော်ငိုလို့ နို့တောင်းကတ်ယင်း
မေမေ မေမေလို့ တတိုးချေတမျိုး အော်လို့တမျိုး ခေါ်ကတ်ယင်းနန့်
ငါ့ဘားသို့ ခုန်တက်လိုက်ကတ်တေ
ယကလေ့ ငါ့နို့တိက ခြောက်ကပ်နီပျာလ်
တယောက်ယောက်က ငါ့အူတိထဲသို့ လီကိုဆက်လို့မှုတ်သွင်းနီရေ
ဘော်လုံးတလုံးထက်ပင်ပိုလို့ ငါ့ဝမ်းက ဖောင်းတက်ပါလတ်တေ
ယေနန့် ပင်လယ်ထက်မှာ ထိုနား အေနား ရွှင့်လိုက် မျောလိုက်ဖြစ်နီရေ
မှန်ထဲမှာက ကောင်းကောင်းပင် ကျယ်ခါ
ဖမ်းဆွဲလိုက်ဖို့ ကောင်ရိုးတမျှင်လေ့ ငါရှာလို့ကမတွိနိုင်
တချက်တချက် ငါ့ ခန္ဓာကိုဖြတ်လို့ လျှပ်စီးပြက်နီရေ
ပင်လယ်ထဲသို့ ငါ ခုန်ဆင်းလိုက်တေ အခါတိုင်း
ကုန်းထက်က အမိအားလုံးရို့ ဖိနပ်တိ
ပင်လယ်ကြမ်းပြင်မှာ တတိတ်ချေနန့် ပျော်ပျောက်နီကတ်တေ
ပြီးကေ
အရာတခါ ခုန်ဆင်းရေ

ကြိုင်နီရေ အာကာက လျှပ်စီးပြက်လိုက်တေ
အလင်းပျောက်ကျပျာလ် မိုးနန့်မြီမှာ အမှောင်အမိုက်
ပြီးကေ
တပြိုင်နက်ထဲ မှန်တိအားလုံး ငါ့ရှိမှာ ကွဲကျလားခရေ
အဝတ်ဖြူဝတ်ပျာလ် လက်အိတ်စွပ်ထားရေလက်တိနန့် လူတိအများကြီး
မှန်ကွဲစတိကို ဖယ်လိုက်ကတ်တေ
ပြီးကေ
သွီးတိပေပျာလ် မျက်စိမိတ်ထားရေ ငါရို့ အမိတိ အားလုံးမှာအမိကို ကောက်ယူလိုက်ကတ်တေ
“လက်ညိုးဆယ်ချောင်းနန့် မင်းသမီချေတပါးပျာလ်”လတ် သူရို့ကပြောကတ်တေ

ကင်ဟီဆွန်း

Remembering the day a daughter was born

ရီသူမအားလုံးက ဇာအတွက်နန့် အမ ဖြစ်ရစော်လေ

ငါ့ဖာသာငါ ကြမ်းထက်မှာ ဖားစင်း​မှောက်ပနာ ငါ့ အရိပ်ကို နမ်း​ရေ
အရိပ်နားရွက်ကို ပဲ့ပါ​အောင် ငါကိုက်​​တေ

ငါ့အရိပ်မှာမျက်စိတိ အ​ရောင်​တောက်ပါလတ်​​တေ

ရီတခါ​ချေပင်​လေ့ မချိုးဖူး​ရေ ကုလားအုတ်ပိုင် လူတ​ယောက်
ငါ့အထက်ဝါမှာ ပုန်းနီ​​ရေ
ငါ့ကို ရီအနက်ထဲ ဆွဲချပနာ ​ချင်ရာလားနီ​ရေ
ငါးမန်းပိုင် အသားအမဲနန့် လူတ​ယောက်
ငါ့​အောက်ဝါမှာ ပုန်းနီ​ရေ

ငါက ရှိကျ​ရေ လူမျိုးဘားမှာ တပိုင်း အစားခံထားရ​ရေ မိန်းမတ​ယောက်
သူရို့လက်ထဲမှာ စူးကြာပွတ်တိနန့်

​ယေနန့် ငါ့နွမ်းနီ​ရေ မျက်နှာမှာ
ကုဘားအုတ်မျက်စိက ပွင့်လျက်၊ ပြူးထွက်နီ​​ရေ
ငါ့နောက်ဘ၀ ခန္ဓါကို အတွက်မရ ​ငေးကြည့်နီ​ရ
လုံးကြီး​ပေါက်လှ သဲ​တောင်ကုန်း အမို့အ​မောက်
မမွီးသိ​ရေ အ​ချေတိ လက်သည်းခွံနန့်တူ​ရေ
စူးတတ်​တေ ငါးအကြီးခွံတရာ
ငါ့ ခြီမျက်စိနားမှာ စူးနီ​ရေ
ယင်းအစူးတိက တခါ​ပင်လေ့ ပြုတ်မကျ

တ​ယောက်က ငါ့လက်တိကို လှုပ်​တေ ပြီး​ကေ သဲကန္တာရ အ၀ီးကြီးကိုလားစီချင်​ရေ

တ​ယောက်က ငါ့ခြီတိကို ချိုင်ထားပနာ သမုဒ္ဒရာ အ၀ီးကြီးကို လားစီချင်​ရေ

ငါ့လက်ညိုးတိမခဲခင် ငါ့လျှာနွီးနွီးက အယင်ခဲလားခ​ရေ
ငါ တတုန်တတုန်နန့်ပြော​ရေ
‘ချမ်း​ရေ ချမ်း​ရေ’
ဓမ္မတာ နာကျင်မှုက ငါ​အောက်ဝါကို အသဲအသန် ပတ်ထား​ရေ
‘နာ​ရေ နာ​ရေ’
ငါ့ခန္ဓါကို ငါ တွန့်လိုက်​တေ
တ၀က်က ကန္တာရမှာ ပိတ်မိနီပနာ
အရာတ၀က်က သမုဒ္ဒရာမှာ

ငါ့အရိပ်နားရွက်ကို ငါကိုက်တေ
ငါ့အထဲမှာ ငါ တရက်လုံး ရီကူးနီ​ရေ

ရီသူမအားလုံးက ဇာအတွက်နန့် အမ ဖြစ်ရ​​စော်လေ
သူရို့​စော်နန့် သူရို့ မျိုးပွားကတ်လာ

ကင်ဟီဆွန်း

Why are all mermaids female? Kim Hyesoon