ဘဝက အိမ်မက်တခု

ကိုယ့်ဖို့ကိုယ် ဖြစ်မြောက်အောင် လုပ်နိုင်ရေအရည်အချင်းတခုက

မင်းကို အဝီးဆုံး ရောက်စီကေ သစ်ဆိုင်ဘေးက နီရာအလွတ်လောက်ဆီဗျာလ်။ယေမှာ သူရို့မှာ နာမည်ခေါ်စာရင်းဟိရေ။

ငါ့နာမည်က အေ နန့်စရေ

ဆိုခါ ပထမဆုံး အအော်ခေါ်ခံရဖို့ထဲက တယောက်ပါ့ယေ။

ငါက ဇာမှာ ရပ်ရဖို့လဲကို မှန်းမကျနိုင်တုန်းသိ။ယင်း အရာသုံးယောက် လေးယောက် အုပ်စုက လိုင်းအစ မသေလာ။

ငါ စူးစမ်းလို့သိဖို့ပင် မရလိုက်ခင် ကြွက်နန့်တူရေ လူတယောက်က ငါ့ပခုံးတိကို လာတိုးရေ။ “ယင်းလမ်းဝေး” မာန်ပါသံနန့်ပြောရေ။ “သူရို့ မင်းကို ကျောင်းမှာ တခုလေ့ မသင်ပီးခကတ်လား။ဇာချင့် ဓါတ်ပုံမဆို အဂင့်ဖြစ်နိုင်ရေ၊  မဖြစ်ချင်လေ့ မဖြစ်ဆိုစော်ကို။မီးဖိုထောင့်၊ နီဝင်ခါနီးအချိန်မှာ မှက်ကောင်ချေ တအုပ်။”

နောက်ခါ ပိုသိလာဖို့ အခွင့်အလမ်းဟိရေ ဆိုစော်ကို ငါ သိပါရေ။လောလောဆယ် လိုလာနီစော်က စောင့်ဖို့စော်ဗျာလ်။

ဘဝက ဇာချင့်မဆို ဖြစ်နိုင်ရေဆိုစော် မှန်ပါရေ။ယလေ့ တချို့စော်တိက လုံးဝ ဘဝမဟုတ်စော်သေချာရေ။

ဥပမာ   ဆက်ဟိနီဖို့ ရည်ရွယ်ထားပိုင်မျိုးနန့်

ငါ့ လက်ထဲကို စိတ်ချလက်ချ ချောသွင်းလာရေ ဒေလက်အိတ်စွပ်ထားရေလက်ပါ့ ။

Life is a Dream by John Ashbery

၁ အက်ရှ်ဘယ်ရီ အသက် ၇၃ နှစ်အရွယ် ၂၀၀၀ခုနှစ်မှာထုတ်တေ your name here စာအုပ်မှာပါရေကဗျာ

ဇရာကို ရောက်ပြီးမှ ရီးရေကဗျာ ဇရာ ဘဝ နိဂုံးတိ မြင်ရပိုင်တွိရေ ဥပမာ နာမည်ခေါ်စာရင်း၊နီဝင်ခါနီး၊နောက်ခါ ပိုသိလာဖို့ အခွင့်အလမ်း၊ စောင့်ဖို့စော် etc

၂ လိုင်း Line တန်းစီနီရေ လူတန်းလို့ ပြောကေရဖို့၊ ယေလေ့ ကဗျာမှာ လိုင်းရေ ကဗျာပါစာကြောင်း ကဗျာမှာ အခြေခံအကျဆုံးထဲက တခု။

၃ တရားသဘောတိလား ဥပမာ မီးဖိုထောင့်၊မှက်ကောင်၊ပိုးဖလံမျိုး မီးကိုတိုးလား

ဇင် Zen ဘာသာရေး အရီးအသားတိပိုင်လာ ဥပမာ အဂင့် ဖြစ်နိုင်ရေ ဆိုရေ အရာမဖြစ်ချင်မဖြစ် 

(ဘာသာရေးကိုတော့မသိပါ ရီးပုံသားပုံကိုရာ ပြောစော်ပါ)

၄ ကျောင်း  စာသင်ကျောင်းလား ဘဝဆိုစော် သင်ယူနီရရေ ကျောင်းလား 

စာသင်ကျောင်းနန့် ပတ်သက်ကေ သူ့ အရာကဗျာတပုဒ်မှာလေ့ တွိစော်က “စာသင်ကျောင်းက အားလုံးကို ဝဖြီးချပ်နန့် ခြစ်ချရေ”လတ်

၅ မရေမရာတိ ဥပမာ မှန်းမကျ၊သိဖို့ပင် မရလိုက်၊ပို သိလာဖို့ etc

 လူမဲ မင်းသား 

တောထဲက ခြီသံတသံ ဟိလီဖို့

မဟုတ်တာ့ ကြွက်ဘုရင်ကြီးဘားက ဒိတ်အောက်နီရေ ရုံးစာတစောင် ဟိလီဖို့

နယ်စပ်ကို ပြန်လတ်ဖိ၊အားလုံးကို ခွင့်လွတ်တေလို့ (ယင်းစာမှာ) ပြောထားရေ။ 

ယေလေ့ မြီပုံမှာမပါရေ ကျွန်းချေတကျွန်းက ကမ်းခြီထက်မှာ 

ဗစမ်းဗရမ်း​တိပြောယင်းနန့် သူက လမ်းပျောက်နီရေ။

သူ့အမူအယာတိနန့် စကားကို တွဲလို့ကြည့်ကေတော့ခါ အဓိပ္ပာယ်အပြည့်အဝပေါ်ပါရေ။

လီက ယင်းနှစ်ခုကို ကွဲလားအောင် တိုက်ပလိုက်ခါမှရာ

ယင်းချင့်တိက အရာမရောက်ဖြစ်လားစော်၊တချို့ရို့အတွက်ရာ အရာရောက်တေ ဖြစ်လားစော်။ 

The Black Prince by John Ashbery 

          1950 60 လောက်ကဆိုကေ Blackတိက အမေရိကန်မှာ marginalizedဖြစ်တုန်း။ ဆိုကေ အေ Blackက  အပယ်ခံကို ညွှန်းလာ။

           F T Prince က တောင်အာဖရိကက ကဗျာဆရာ။လူဖြူ အာဖရိကန်ရာ။Soldiers Bathing ဆိုရေ သူ့ကဗျာတပုဒ်ကိုရာ လူတိက အမှတ်တရဟိကတ်စော်များရေ အရာသူ့ကဗျာတိက ကောင်းအတူးမခံကတ်လို့ဆိုရေ။ အေချင့်ကတော့ခါ ဝေဖန်ရေးတိက တဆင့်သိရစော်တိပါရာ။ယင်းချင့်တိကို မသိကေလေ့ အေကဗျာကို ဆက်ဖတ်လို့ ရရေထင်ပါရေ။

          ဗစမ်းဗရမ်းပြောနီကေလေ့ အမူအယာနန့်တွဲကြည့်ကေတော့ခါ ဇာပြောချင်စော်လေ မှန်းလို့ကျနိုင်ရေမလား။စိတ်မငြိမ်ဖြစ်နီရေ မတင်မကျဖြစ်နီရေ ဆိုစော်တိကို ခံစားမိနိုင်စော်ဗျာလ် မလား။ တခါတခါ တခုခု က ယင်းအတွဲအစပ်ကို ဖျက်ပလိုက်ခါမှရာ မှန်းရ ခက်လားစော်မလား။လူလူချင်း ဆက်သွယ်မှုမှာ Verbal communication ကဝေါ်မျှလောက်ပါလေ။မျှလောက် တကျလေ။ စကားလုံးတိနောက်မှာ အမှန်ဟိနီစော်တိ မဟိနီစော်တိကို မှန်းကြည့်လို့ ရခါလေ့ ရရေမဟုတ်လား။

      တချို့တိအတွက်တော့ခါ ယင်း ဗစမ်းဗရန်းတိ အရာရောက်တုန်းသိရာလေ။ဇာပင်ဆိုဆို။

အက်ရှ်ဘယ်ရီက သတင်းစာတိ၊မဂ္ဂဇိင်းတိ၊ဂန္ထဝင်ပန်းချီတိနန့် တခြားအရင်းအမြစ်တိကနီတဆင့် မြင်ရရေ ပဋိပက္ခဆန်ရေ ကမ္ဘာ့မြင်ကွင်းတိကို ထင်သာအောင်ကောက်နှုတ်ပြတတ်တေ။ fr Publishers Weekly

Ashbery ကို Difficult Poet လို့ဆိုကတ်တေ။ မှန်းဆရခက်တေ ကဗျာတပုဒ်ကို ရိုးရေ Catalogueနည်းနန့် ဖွဲ့ထားရေထင်ပါရေ။

သူရို့ ဇာလိုချင်ခလေ သူရို့သိခရေ

သူရို့အားလုံး သမီးသျှင်မကို နမ်းခကတ်တေ။

သူရို့အားလုံး ရယ်ခကတ်တေ။

သူရို့ ထိုးအာကာသက လာခကတ်တေ။

သူရို့ ညဉ့်ခါလာခကတ်တေ။

သူရို့ မြို့တမြို့ကို လာခကတ်တေ။

သူရို့ အမေရိကကို ဖောက်ခွဲဖို့လာခကတ်တေ။

သူရို့ လာ့စ်ဗေးဂတ်စ်ကို ဓါးမြတိုက်ဖို့ လာခကတ်တေ။

သူရို့ မချစ်ဝံ့ကတ်။

သူရို့ ဘုတ်ဖိနပ်မချွတ်ပဲ သီခကတ်တေ။

သူရို့ မြင်းတိကို သေနတ်နန့်ပစ်ခကတ်တေ၊မဟုတ်လား။

သူရို့ အကြီးအကျယ်ပေါက်တေ။

သူရို့ ငါလိုစော်ကို လုပ်ပီးကတ်တေ။

သူရို့ နှုန်းချင်းထဲပျံခကတ်တေ။

သူရို့ သူ့ကို သေနတ်တလက်ပီးခကတ်တေ။

သူရို့ အိမ်ထောင်ပြုကတ်ရရုံ။

သူရို့ နီခကတ်။သူရို့ ဘဝကို ချစ်ခကတ်တေ။

သူရို့ ညဥ့်မှာနီကတ်တေ။

သူရို့ ညဥ့်မှာမောင်းကတ်တေ။

သူရို့ မစ္စတာနှိုက်ကို သိခကတ်တေ။

သူရို့က ချဲ့လို့ကားလို့ရရေ။

သူရို့ အာဂျင်တီးနားမှာတွိခကတ်တေ။

သူရို့ ဘုံဘေမှာတွိခကတ်တေ။

သူရို့ အမိုက်မှာတွိခကတ်တေ။

သူရို့က ဧရာမအကောင်ကြီးတိဟိဖို့။

သူရို့ငါ့ကို ဝရမ်းပြီးဖြစ်အောင်လုပ်ခကတ်တေ။

သူရို့ ငါ့ကို ရာဇဝတ်သားဖြစ်အောင်လုပ်ခကတ်တေ။

သူရို့က သူရို့သခင်တိကိုသတ်ခကတ်ရုံရာ။

သူရို့ ဂီတသံကို ရရဖို့။

သူရို့က ညီအစ်မတိ။

သူရို့က ငါ့ကို ဘရုစ်လို့ခေါ်ကတ်တုန်းသိ။

သူရို့ငါ့ကို ယုံလီဖို့မဟုတ်။

သူရို့ မိလီကတ်ဖို့မဟုတ်။

They knew what they wanted John Ashbery