Hills and Riverbanks

အိုက်စကရိန်းဧကရာဇ်

ဆီးသားလိပ်ကြီးတိ လိပ်တေ အားလာကြီးကိုခေါ်လိုက်
ပြီးကေ မီးဖိုခန်းက ခွက်ထဲမှာ ရမ္မက်ကြွ နို့ချိုင်ကိုမွီခိုင်း
ကလေ့မေချေရို့က ဝတ်နီကျအဝတ်တိ ဝတ်ပနာ
ပျိုင်းပျိုင်းရိရိ လမ်းသလားနီကတ်ပတ်စီ
ကလေချေရို့က အယင်လက သတင်းစာတိနန့်ပတ်ပနာ
ပန်းတိကို ယူလာကတ်ပတ်စီ
ဖြစ်နီစော်ရေ ထင်ရေစာ်မှာ အဆုံးသတ်ခန်း ဖြစ်ပါစီ
တယောက်ထဲသော ဧကရာဇ်က အိုက်စကရိန်း ဧကရာဇ်ပါရာလေ

ဖန်လက်ကိုင်ဘု သုံးလုံးမဟိရေ သစ်ဖြူ အန်ဒမာရီထဲက
တခါက ငှက်ရုပ်တိပန်းထိုးထားခရေ အချာဟတ်ကိုယူ
ပြီးကေ သူ့မျက်နှာကို ဖုန်းဖို့ ယင်းအဟတ်ကို ဖြန့်လိုက်
အသားမာတက်နီရေ သူ့ခြီထောက်တိ အပြင်ထွက်ကျန်ခစော်က
သူ ဇာလောက်အီးစက်နီလေ အသံတိတ်နီလေဆိုစော်ကို ပြစော်ရာဟိလီဖို့
မီးအိမ်က သူ့အလင်းကိုသူ တွယ်ကပ်ထားပါပတ်စီ
တယောက်ထဲသော ဧကရာဇ်က အိုက်စကရိန်း ဧကရာဇ်ပါရာလေ

ဝေါလေ့စ် စတီဗင်
…………………………..

Wallace Stevens က အနောက်မော်ဒန်မှာ ဆရာတဆူ
ဗမာဆရာတိ မိတ်ဆက်စော်ကောင်းမတွိ ဆိုခါ ကိုယ့်ဘားမှာ အသိဆကေနည်းရေ

ကဗျာရေ ဆင်ခြင်ဥာဏ်နန့် ထောက်ဆစော်ကို ခုခံနိုင်ရဖို့ဆိုရေ ဝေါလေ့စ်ကဗျာကို ပြန်မိစော်က ကြိုက်လွန်းလို့ရာ
အပြည့်အဝတော့ ကိုယ့်စကားနန့် မဖမ်းဆုပ်နိုင်

အားလာကြီး က muscular one
ဆကေ ပေါ့ပါးစီချင်လို့ ယပိုင်ပြန်ကြည့်စော်
ကလေ့မေချေ ဆိုစာက မူရင်းမှာ wench
သူက မိန်းမချေလို့လေ့ပြောလို့ရပိုင် မကောင်းစော်မလို့လေ့ အဓိပ္ပါယ်ဟိပါရေ

ဖြစ်နိန်စော်ရေ…..ဖြစ်စီက Let be be finale of seem ကို အတတ်နိုင်ဆုံးပြန်ကြည့်စော်ပါ
မူရင်း စကားကိုပင် ဝေဖန်ရေးသမားတိက မတူရေ ရှုထောင့်တိက ဖွင့်ဆိုကတ်စော်တိ အင်တန်တွိပါရေ ကျနော် ခံစားမိပိုင်ပြန်မိစော်ပါ

သစ်ဖြူက dealကို ပြန်စာ တဘက်မှာ အပီးအယူ အညှိအနှိုင်းသဘောလေ့ ဟိရေ မပြည့်စုံ နွမ်းပါးရေဆိုရေသဘောလေ့ပါအောင် သစ်ဖြူလိုရာပြန်လိုက်ပါရေ အမှန်က ကျနော်ရို့ဘက်က ဆောင်းဒူသားနန့် ပိုတူဖို့

အချာဟတ်sheet က စာလုံးပေါင်း မှန်မမှန် မသေချာ

ရှင်းခြင်းနန့် သီခြင်းကို ဖွဲ့ရေကဗျာ
မူရင်းမှာ ရှင်ခြင်းကို ဖွဲ့ရေ
ပထမပိုဒ်နန့် သီခြင်းကိုဖွဲ့ရေ ဒု ပိုဒ်ကို စာကြောင်း ၈ ကြောင်းစီနန့် ဆတူဖွဲ့ပါရေ တည်ဆောက်မှုပုံစံနန့် ဆတူသဘောကို ပိုမြင်သာစီချင်ပုံရပါရေ သီခြင်း ရှင်ခြင်း ဆတူ
မိန်းမချေ ယောက်ျားချေတိနန့် ပွားလာဖို့ ရှင်ခြင်း
အသားမာတက်နီရေ အိုမင်ခြင်း အီးစက်နီရေ သီခြင်း
အတတ်နိုင်ဆုံး စကားလုံးဆတူဖြစ်အောင်တော့ ကြိုးစားကြည့်ထားပါရေ

အချိန်ရကေ ထပ်ကစပ်ကြည့်ချင်သိရေ

နွီဦးမတိုင်ခင် စိတ်ကျခြင်း

ကြက်ဖက တွန်ရေ
ယေလေ့ မိဖုရားက ထမလာ။

ငါ့ရွှေဆံပင်မချေမှာ ဆံပင်တိက
တောက်ပနီရေ၊
လီကို ​ခြည်ထိုးနီရေ
နွားလျှာရည်ပိုင်။

ဟိုး ဟို

ယေလေ့ ကီကရီးကီ ကြောင့်
ကူးကူ မပေါ်လာ။
ကူကူးကူ က မဟိ။
ယေလေ့ ကြားညှပ်ဖိနိပ်အစိမ်းနန့်
မိဖုရားက ပေါ်မလာ။

Depression Before Spring

ဘဝက အရွိ

အိုကလာဟိုးမားမှာ
ဘွင်နီနန့် ဂျိုစီ
ဖျင်ကြမ်းတိ ဝတ်ပနာ
အပင်ငုတ်တ်ိုကို ပတ်လို့ ကကတ်တေ
“အိုဟိုယားဟို
အိုဟူး …”
သူရို့အော်ကတ်တေ၊
အသွီးအသားနန့် လီနန့် သမက်တက်စော်ကို
ဂုဏ်ပြုယက်ပင်း။

Life is Motion

မျက်နှာပြင်

ငါ့ အခန်းထဲမှာ၊ ကမ္ဘာက ငါ့ နားလည်နိုင်စွမ်းအလွန်မှာ
ယေလေ့ ငါ လမ်းလျှောက်ခါ ငါ တွိလိုက်တေ၊
ကမ္ဘာက တောင်ကုန်း သုံးလေးကုန်းနန့် မိုးရိပ်တရိပ်နန့် ဖွဲ့စည်းထားရေ

ငါ့ ဗရန်ဒါကနီပနာ လီအဝါကို ငါ လေ့လာကြည့်ရေ
ငါစာရီးနီခရေ နီရာမှာ စာဖတ်ယက်ပင်းနန့်
“နွီဦးက အဝတ်ချွတ်နီရေ အလှမချေပိုင်”

ရွှေသစ်ပင်က အပြာရောင်။
အဆိုတော်က သူ့ ဝတ်ရုံကို ခေါင်းထက်ဆွဲတင်လိုက်တေ။
လဇနီက ယင်းဝတ်ရုံ ခေါက်ကြောင်းတိကြားမှာ။

Of Surface Of Things Wallace Stevens